05.07.2008 - Váleg tíðindi frá Taívan
Ekki berast skemmtilegar fréttir að austan um þessar mundir. Þotuknúið Rafale módel flaug inn í íbúð á 28.hæð í íbúðarbyggingu í Taipei og olli þar eldsvoða og talsverðum skemmdum ásamt því sem rýma þurfti blokkina. Sem betur fer slasaðist engin alvarlega í óhappinu.Ekki er vitað hvað olli óhappinu en ein afleiðing af því er sú að öðrum af tveimur flugvöllum við höfuðborgina var lokað. Borgaryfirvöld fyrirskipuðu tafarlausa lokun á flugvellinum, sendu jarðýtur á svæðið til að fjarlægja flugbrautina og skilgreindu nánasta umhverfi sem flugbannssvæði.
Þegar þessi flugvöllur var byggður á sínum tíma þá var byggðin ekki komin svona nálægt honum en með vaxandi fólksfjölda þá hefur byggðin færst sífellt nær flugvellinum. Þetta er þróun sem við höfum horft upp á hér heima en vonandi þurfum við ekki að lenda í svipuðum aðstæðum í framtíðinni.
Flugmaðurinn hefur samþykkt að greiða fyrir allar skemmdirnar, brunann í íbúðinni, lyftukerfið og BMW sem skemmdist í bílakjallaranum vegna vatns frá slökkviliðinu.
Hægt er að sjá fleiri myndir af vettvangi með því að smella hér. Smá vídeóbút er hægt að sjá hér.
